Opinione, Televizioni

Top 50 programet në kanalet kosovare për sezonin televiziv 2011-2012

Edhe këtë vit si zakonisht, Telekomanda rendit programet më të mira në kanalet kosovare. Për dallim nga dy vitet e kaluara, këtë vit kjo listë është zgjeruar në 50 programe. Nga e hëna 7 maj e deri të premten me 11 maj, çdo ditë janë numëruar nga 10 programe duke nisur nga programi i renditur në pozitën e 50të deri tek programi më i mirë.

Programet janë renditur sipas mendimit kritik personal të autorit dhe nuk paraqesin ndonjë sondazh apo anketë të gjerë. Në listë janë përfshirë të gjitha programet që janë transmetuar ndërmjet periudhës Shtator2011-Maj2012 në kanalet kombëtare dhe ato kabllore kosovare.

50 Kombinati (K Channel)

Këtë listë, të parën e këtij lloji në shqip do ta hap me serialin Kombinati. Personalisht kam qenë shumë për anulimin e serialit Familja Moderne sidomos vitin e kaluar. Dy sezonet e fundit vetëm sa kanë lënduar imazhin e serialit që ishte bërë simbol i televizionit të pasluftës në Kosovë. Megjithatë RTK nuk ka ofruar asgjë më të hajrit pas anulimit të Familja Moderne. Kombinati duket të jetë një riformësim i Familja Moderne në një format paksa më ndryshe sa për të freskuar shikuesit. Është e vërtetë që disa karaktere të Familja Moderne si Daja e Longari na kanë munguar dhe shikimi i aktorëve që kanë portretizuar këto karaktere në role tjera është një risi e këndshme. Megjithatë vet koncepti i serialit nuk ofron diçka shumë kreative, arsyeja kryesore pse vendoset vetëm në pozitën e 50të.

49 Heroes (Klan Kosova)

Nuk jam fans i serialeve fantastiko-shkencore, por Heroes është njëri nga serialet më të mira të këtij zhanri që kam parë. Akoma mendoj që ka përfunduar para kohe dhe padrejtësisht është anuluar nga kanali NBC. I shfaqur së pari në Klan TV, rikthimi në Klan Kosova ka qenë një veprim shumë i mençur i këtij televizioni. Në përgjithësi Klan Kosova ka sjell disa seriale të shumë cilësore amerikane që disi na ka mbajtur të lidhur me elitën e serialeve amerikane. i pari në këtë listë është Heroes që po të transmetohej para disa viteve do të zinte vend së paku nja 30 pozita më lartë.

48 Kapital (RTK)

Dy emisione pothuajse të ngjashme për ekonomi në një kanal duken si shumë. E në fakt edhe ndoshta janë, por edhe pse nuk kanë ndonjë dallim shumë domethënës, Kapital dhe Subvencion megjithatë ndryshojnë jo vetëm në këtë renditje. Ajo çfarë nuk më pëlqen tek Kapital është orari i transmetimit që është të shtunave. Por, gjatë këtyre muajve që është duke u shfaqur ka ofruar disa debate dhe raporte mbi tema të llojllojshme gjë e cila edhe e vendos në skaj të kësaj renditjeje, por gjithnjë me një potencial për ngritje nëse kthehet në ekran gjatë vitit të ardhshëm.

47 Kult (RTK)

Përkundër viteve Kult vazhdon të mbijetoj në ekranet e RTK-së. Shpesh herë më ka rënë të shikoj këtë emision përkundër asaj që nuk jam shumë i dhënë pas temave që trajtohen. Arsyeja pse kam shikuar unë dhe shumë veta të tjerë besoj ka qenë pritja për fillimin e Oxygen. Me këtë dëshiroj të them që ndihmë të madhe ky emision ka marrë nga pozita ku transmeton dhe atë jo pse ndjek Debatin, por sepse i paraprinë Oxygen-it. Vet përmbajtja e emisionit është e nivelit më të lartë duke arritur të mbuloj të gjitha ngjarjet kryesore kulturore brenda atyre pak minutave që ka në dispozicion.

46 Bon Bon (RTV21)

Bon Bon vazhdon të mbetet emisioni më i mirë i pasdites së hershme në kanalet tona kombëtare. Për dallim me konkurrencën është zgjedhja më e mirë pasi ofron shumëngjyrshmi të informatave nga fusha të ndryshme. Ajo çfarë ka vazhduar të më pëlqej tek ky emision është udhëtimi nëpër qendra të ndryshme duke afruar emisionin me shikuesit dhe hallet e tyre. Gjithashtu edhe përzgjedhja e mysafirëve ka qenë solide.

45 Gossip Girl (Klan Kosova)

Gjithnjë kam konsistuar në atë që nevojiten më shumë seriale dhe programe cilësore për adoleshentët tanë. Transmetimi i One Tree Hill për nja dy muaj të verës së 2010tës në KTV ka qenë hapi më i mirë që është bërë në këtë drejtim, deri në fillimin e Gossip Girl në Klan Kosova. Dy seriale krejtësisht të kundërta për kah ambienti ku zhvillohen por me një bazament pothuajse të njëjtë. Gossip Girl është seriali që mbulon kategorinë serialeve për të rinj në Klan Kosova dhe siç kam përmendur tek Heroes, Klan Kosova ka disa seriale në këtë listë, edhe më lart se kjo pozitë. Personalisht Gossip Girl është një ndër serialet e mija të preferuara.

44 Amkademiku (K Channel)

Sa keni qenë të eksituar për rikthimin e Stupcave në televizion? Personalisht mëzi kam pritur. Por, transmetimi në televizion kabllor duke lënë më shumë se gjysmën e shikuesve potencial, dhe kur them gjysmën bëhem shumë zemërgjerë pasi ka shumë më tepër shikues që nuk shohin këtë prodhim të tyre ka qenë pak zhgënjyese. Asgjë kundër Kujtesa-s, por unë që nuk jam në qytet të vetmen mënyrë për të parë Amkademikun kam një episod promovues në faqen e tyre dhe video ilegale që së fundmi është vështirë të gjenden. S’dyshoj që meritojnë të renditen më lart, por ndoshta me fillimin e IPTV transmetimeve të Kujtesa atëherë mund të kënaqemi më shumë me komeditë e tyre të fundit.

43 2me1 (RTV21)

Ky emision vazhdon të mbetet emisioni më i mirë sportiv në Kosovë. Agim Binaku ka arritur të ruaj bukurinë e 2me1 duke ndryshuar gjithnjë vetëm për të mirë. Me mysafirë të veçantë të cilët gjithnjë ofrojnë një dozë analize racionale dhe mendjeholle për temat që diskutojnë padyshim që duhet të zë vend edhe më lartë në këtë renditje. Personalisht mendoj që është një ndër emisionet më të mira sportive debutuese në shqip krahasuar AS dhe Sporti Total.

42 Telekino (RTK)

Si programi i vetëm për filmin në kanalet tona kombëtare, Telekino ka arritur të mbaj shikuesit të informuar për të fundit nga bota e kinematografisë. Me edicione speciale nga Sundance Film Festival e Berlinale, Mirjeta Baraliu ka vazhduar të ofroj një atmosferë origjinale nga eventet më të mëdha të filmit. Vendosja në një orar prime-time, debatet në studio kanë bërë emisionin edhe më interesant dhe informativ për shikuesit. Megjithatë mos ofrimi i një orari të vazhdueshëm ka lënduar këtë emision që ka potencial të jetë ndër programet më të mira.

41 Superliga e Kosovës (RTK)

Transmetimi i Superligës së Kosovës në futboll ka qenë një gjë që do të duhej të ndodhte patjetër. Në fakt ishte mënyra e vetme për ringjalljen e shikueshmërisë, edhe ashtu të varfër të kësaj gare. Marrëveshja e DigiWorx me RTK që i lejonte kësaj të fundit të transmetonte dy ndeshje në xhiro ishte shumë e rëndësishme për ti dhënë një mbulueshmëri kombëtare kësaj gare, një zgjedhje më e dobishme në krahasim me transmetime të paguara. Edhe pse niveli i cilësisë ndoshta nuk është zhvilluar më shumë, ngjashëm si sjelljet e shikuesve, transmetimi i Superligës së Kosovës në futboll është një veprim shumë i mirë.

40 Super Gogo (RTK)

Nëse ekziston një departament në RTK që ka pasur sukses këtë vit padyshim është ai i programeve për fëmijë. Alfabeti magjik dhe Ne janë dy emisione shumë të mira dhe të përshtatshme për demografitë e tyre, por ai që vazhdon të shkëlqej padyshim është Super Gogo. Tashmë në sezonin e dytë nëse s’gabohem Super Gogo është një emision që duhej të shikoj gjithqysh të shtunave. Pos që ofron njohuri dhe informata të reja për fëmijët në mënyra atraktive dhe joshëse Super Gogo ofron argëtim edhe për të rriturit duke e shndërruar në një program familjar.

39 Dokumentari n’5e30 (RTV21)

Një termin i mbushur me dokumentarë shumë informativ dhe interesant ka qenë ora 5e30 pasdite në RTV21. Shpeshherë më ka rastisur të shoh këta dokumentarë nga fusha të ndryshme. Pikërisht ky diversitet më ka pëlqyer më së shumti për këtë këta dokumentarë. Dua të them kanë ofruar nga pak nga shumë fusha të jetës qoftë udhëtimet, letërsia, zoologjia etj. Megjithatë ka munguar reklamimi dhe mendoj që shumica e shikuesve edhe nuk janë informuar kurrë për këta dokumentar.

38 House (Klan Kosova)

Të pranoj që nuk jam një fans i madh i serialeve medicinale. Çdo episod del një sëmundje e re dhe si me pahir disa nga simptomat që kanë pacientët më prekin edhe mua për të dal krejt alarm i rrejshëm. Derisa disa të tjera si Grey’s Anatomy lidhin jetën profesioniste me atë të përditshme të karaktereve në një masë dhe mënyrë ta quaj të thjeshtë, tek House kjo ndodh në një mënyrë të veçantë. E kur tërë kësaj ia vëmë Hugh Laurie në rolin kryesor, atëherë na del një kombinim perfekt televiziv. E di se për mjekët karakteri i House është paksa i fryer, por për shikuesit e thjeshtë ai është njëri nga karakteret më të mira në televizion.

37 Koha për muzikë

Sa herë keni parë Mastroianin këmbëzbathur të hënave në KTV? Shumëherë! Duhet të pranojmë që kjo ishte e tepërt! Por, përjashto këtë KTV ka ofruar disa koncerte fantastike në këtë orar duke ofruar një alternativë perfektë karshi Kabare dhe ndonjë episodi të dobët të Kafeneja Jonë apo intervistave të papritura të kryeministrit dhe të tjerëve në këtë termin. Disa nga yjet më të mëdha të muzikës botërore kanë ardhur tek ne me anë të këtij emisioni duke na ofruar atë që pak e njohin këngëtarët tanë, muzikën live.

36 Rendez Vous (RTV21)

Tema dhe debate interesante për një sezon të tërë. Emisioni i vitit të ri ka qenë ndër më të mirë dhe më argëtuesit. Sidoqoftë në përgjithësi emisioni Rendez-Vous ka qenë një ndër programet më cilësore në RTV21. Në krahasim me Relax dhe 1 Kafe me Labin është në një nivel shumë më të lartë. Mënyra e udhëheqjes nga ana e autorit krijon hapësirë për një debat frytdhënës. Edhe pse studioja do të ishte më mirë me më pak ngjyrë të bardhë.

35 Fjalëkryq (Klan Kosova)

Zona B dhe Zona e Debatit janë arena që dominohen nga Baton Haxhiu varësisht prej mysafirëve të cilët dhe kthehen në një vegël për interesat e tij. Fjalëkryq është diçka më ndryshe. Në fakt të them krejt ndryshe s’besoj që do të ishte e ekzagjeruar. Debutuesit dhe mysafirët kanë më shumë hapësirë dhe moderimi nga ana e autorit është më i lirë më demokratik. Meriton të jetë pjesë e kësaj liste.

34 1 Kafe me Labin (RTV21)

Nuk është formati më i mirë që ka ofruar Labi ndonjëherë. Para dy sezoneve kur shëtiti krejt Kosovën ishte periudha më e mirë për këtë emision. Pastaj kaloi nëpër diasporën, një veprim jo shumë i dobishëm për mendimin tim, dhe së fundmi ka ardhur me një riformësim total të emisionit. Ajo çfarë më pëlqen është interaktiviteti me shikues të thjeshtë. Kjo e bën emisionin më të thjeshtë, më special dhe më të afërt me shikuesit. Ide e mirë, por megjithatë ka shumë mundësi për përmirësim. Këtë vit vetëm pozita e 34të.

33 Rrebelët (KTV)

Të rikthyerit që po korrin suksese. Një pyetje që më ka rastisur të dëgjoj shumë shpesh nga njerëzit, në këtë rast adoleshentët është “Kur transmetohet repriza e Rebelëve?”. Nuk dyshoj që është njëri ndër serialet epike për shikuesit kosovar, dhe rikthimi i këtij seriali në një cikël të ri sigurisht që konsiston me një gjeneratë që para 6 viteve ka qenë shumë e re për të kuptuar këtë serial dhe tani është në moshën e përshtatshme për këtë serial. A është kryevepër e këtij zhanri?! Nuk jam i sigurt, por për adoleshentët kosovar, Rebelët janë gjë trendi, diçka pa të cilën nuk mund të rritesh. Diçka si provim mature për të mbyllur shkollën e mesme J

32 Filmat në KTV (KTV)

Para dy viteve KTV nisi të bëj një “revolucion kinematografik” duke sjell tituj të kritikuar lartë dhe të suksesshëm në kinematë për të gjithë shikuesit kosovar dhe atë pa pasur nevojë të paguajnë për të parë këta filma. Personalisht ajo periudhë ka qenë një mini-parajsë për filmdashësit kosovar. Por, këtë sezon KTV na ka dëshpëruar me përzgjedhjen e filmave. Sidomos muaji prill ka filluar të kthej KTV-në nivelin e RTV21 dhe RTK të cilat nuk transmetojnë filma cilësor, së paku jo para festës të vitit të ri. Megjithatë duhet pranuar që RTV21 ka krijuar një termin të zakonshëm të shtunave duke shtyrë edhe Unë Jam Top Model shumë më vonë. Por, përzgjedhja e filmave mbetet e dobët, duke e lënë KTV shumë më lartë, akoma.

31 Koha e Paradites (KTV)

Vitin e kaluar Koha e Paradites ose më saktë Matinee ka qenë ndër programet më të veçuara. Akoma mbetet ashtu veç pse këtë vit është më poshtë në renditje shkaku i zgjerimi të kësaj liste. Ky emision të cilin shpesh e identifikoj vetëm me Matinee vazhdon të jetë emisioni i preferuar i mëngjesit për mua. Ofron disa tema interesante me mysafirë të zgjedhur dhe adekuat. Lidhja e dëgjuesve e bën edhe më informativ këtë emision, e ndonjëherë edhe më argëtues siç ishte rasti i asaj fanses së Behxhet Pacollit! Sidoqoftë emisioni është i një cilësie të lartë dhe shumë më thjeshtë dhe ngushtë se sa që ishte PFM më parë.

30 SinkroCinema (KTV)

Ky program është nga ata që i urrejnë dhe mendojnë se nuk kanë vend në televizion, sidomos në atë kombëtar dhe në ora 22. Njëkohësisht është ndër programet më interesante dhe të pështira në të njëjtën kohë. Varësisht prej filmit të cilin zërojnë dhe skenës ky emision nganjëherë di të ofroj argëtim dhe komedi cilësore për të rritur, por shpeshherë e teprojnë me banalitet. Zërat janë të shkëlqyeshëm, por mund të jenë më pak banal që të kënaqemi pa pasur nevojë të turpërohemi.

29 Dokumentarët në KTV (KTV)

KTV zakonisht ka sjell dokumentarët e BBC-së. Sigurisht që BBC është një ndër prodhuesit të dokumentarëve më të mirë në histori të televizionit dhe rrjedhimisht me anë të KTV-së kemi qenë në gjendje të shohim disa nga këta dokumentarë. Megjithatë mungesa e një orari të sigurt, dhe vendosja e tyre vetëm në mungesë të futbollit nuk ka mjaftuar. Pse të mos vendosen një natë në primetime gjatë javës si për shembull të hënave në ora 20, dhe në cilëndo ditë të javës nga ora 22:15. Këtë vit vetëm pozita e 29të për Dokumentarët në KTV.

28 Lale (KTV)

Definitivisht nuk është seriali im i preferuar turk që është transmetuar këtë sezon. Për më tepër jam befasuar me përmasat me të cilat flitet dhe rrjedhimisht edhe shikohet. Më është dukur shumë i përzier dhe disi si i butë. Edhe pse ajo sigla e fillimit është e mirë, ngjarja është shumë e komplikuar. Por, mesa duket njerëzve ju pëlqen. Janë për tu habitur komentet dhe vizitat që bëhen në kategorinë e këtij seriali në Telekomanda.com, ngjashëm si komentet e njerëzve të ndryshëm. KTV dhe përzgjedhësi i këtij seriali doli më i mençur se unë, por, megjithatë akoma vazhdoj të mendoj, dhe jam i sigurt që ka pasur mundësi të zgjedhnin diçka edhe më të madhe. Për këtë s’dyshoj.

27 Subvencion (RTK)

Emisioni debatues për ekonomi më i mirë në kanalet tona, pa dyshim. I nisur jo para shumë sezonave, emisioni ka arritur të siguroj një pozitë të qëndrueshme në skemë programore dhe të krijoj një baëz shikueshmërie të kënaqshme. Me trajtimin e shumë temave të duhura, aktuale dhe me mysafirë të theksuar në lëminë e tyre, Subvencion ka krijuar një imazh që vlerësohet nga shikuesit. Personalisht pos që është zgjedhja ime e preferua të hënave në ora 10 ndaj programeve tjera, mendoj që edhe ofron informata të dobishme në qoftë se ju interson fusha e ekonomisë.

26 Sulltani (RTV21)

Nuk ka vend në Evropën Qëndrore dhe Lindore, Lindjën e Mesme, dhe Afrikën Veriore që nuk transmeton Sulltanin. Ky serial është shpërthimi i produksioneve turke në mbarë botën. Kam pritur i eksituar këtë serial në televizionet tona dhe nuk jam i dëshpëruar. Personalisht nuk ndjeki vazhdimisht këtë serial, por mendoj se ka një cilësi solide. Të tjerët mendojnë që është i shkëlqyeshëm, por nuk është bash kryevepër. Shikueshmëria nuk mungon dhe ajo çfarë ka përcjell nga Ezel ka mbetur në një nivel, e edhe ndoshta është rritur.

25 La Liga (KTV)

La Liga për 36 xhiro është liga më e kotë në botë. Janë vetëm dy xhiro kur unë shikoj La Ligan, përkatësisht derbit ndërmjet Barcelonës dhe Realit. Për dallim nga unë, shumë shikues shikojnë 38 xhiro në vit pasi ose janë fansa të Realit ose Barcelonës. Unë s’jam dhe nuk më intereson shumë futbolli spanjoll. Këtë vit KTV ka bërë një hap të mençur duke mos transmetuar të gjitha ndeshjet e mundshme. Nëse nuk është asnjëri nga gjigantët në televizion ose nuk është një derbi, nuk ia vlen për të humbur një orar të mbrëmjes. Por, në vend të ndeshjeve kemi pasur filma, disa interesant disa jo edhe aq të mirë. La Liga më së shumti ka lënduar KTV-në duke ia hequr orarin e mbrëmjes gjatë fundjavës. Për këtë arsye Bundesliga dhe Premier Liga janë shumë më interesante dhe më të mira.

24 Talk (KTV)

Për Talk mendoj që është një ndër emisionet që zgjon kërshëri tek shikuesit e interesuar në botën e shoubizit. Në një mënyrë emisioni i afron estradën tonë me shikuesit duke i ofruar një këndvështrim tjetër, më personal. S’dyshoj që kjo zgjon interesim tek shikuesit, megjithëse personalisht nuk më intereson për storiet e shumicës së mysafirëve. Por, emision ka kreativitet dhe origjinalitet që meriton të vlerësohet me këtë pozitë.

23 Kubi ku zinë (KTV)

Kubi ku zinë është emisioni më i mirë i ri që ka ardhur në ekranet kosovare këtë vit. Ka shumë gjëra që e bëjnë këtë emision të shkëlqyeshëm, por ka edhe gjëra që i mungojnë. Të nisim nga moderatorja shumë modeste që arrin të shfaq një interesim të sinqertë për punën e kuzhinierëve në studio. Veshje adekuate, komunikim i qetë dhe kureshtar, dhe një shpërndarje kohe perfektë ndërmjet garuesve. Një studio e shkëlqyeshme, shumëngjyrëshe, e ndriçuar mirë të cilës i mungon publiku. Dy degustator të cilët vetëm humbin kohë sidomos me pavendosshmërinë e tyre për të shpallur fituesit. Këshilla ime: largojeni formatin e garës, thjeshtë bëjeni një mënyrë promovuese për restorantet dhe sillni shikues të cilët do të kenë nderin të shijojnë ato ushqime.

22 1001 Net (KTV)

Qëndroj akoma prapa fjalëve që kam përmendur vitin e kaluar se 1001 net është një serial që na sjell produksionin turk nga një këndvështrim tjetër nga ai që ishim mësuar të shohim. Derisa Jetë e Hidhur dhe Lugina e Ujqërve kishin ofruar seriale të përzier me dramë, aksion dhe triller, 1001 net sjell një dramë që përzihet me zhanrin familjar dhe ofron një dozë të bollshme romance. Ky serial ka arritur të marrë një shikueshmëri dhe muhabet të konsiderueshëm edhe në Kosovë siç kishte ndodhur në të gjitha vendet ku është transmetuar. Në fakt ka qenë një ndihmë indirekte edhe për shikueshmërinë e Sulltanit në RTV21.

21 Prive (RTV21)

Liberta Spahiu ka arritur të krijoj një imazh shumë të suksesshëm për Prive. Ky emision gëzon epitetin e emisionit elitar për fushën e shoubizit në televizionet kosovare. Intervista ekskluzive, trajtime të temave më të nxehta për rininë dhe fansat e fushës së shoubiz e kanë bërë këtë emision një përzgjedhje të parë edhe në krahasim me emisionet e zhanreve tjera. Personalisht nuk jam në demografinë që shikoj këtë emision, por e di që ka me mijëra veta që këtë emision e vendosin edhe në pozitën e parë të listave të tyre.

20 2 Plus (KTV)

Promoja, sigla fillestare ka qenë ndër më të dobëtat që kishte përgatitur stafi artistik i KTV-së. Sigurisht ka qenë një ditë me shi, apo pa diell që ka rezultuar me mungesë kreativiteti e që më pas është përmirësuar! Ideja e emisionit është e mirë, ka potencial, vërehet vullnet tek prezantueset, por akoma nuk është rahatuar, nuk ka krijuar identitet. Arsyeja kryesore koha e shkurtër dhe rubrikat e tepërta. Më mirë ka qenë prej 2 deri në 12, sesa 2Plus. Nuk nevojiten 10 orë, por mjafton 2 orë për të krijuar një emision fantastik që do të mund të dominonte mesditën e të dielave.

19 Ora e pasdites/Info-Magazine (Klan Kosova)

Pozita e 18 do të ndahet ndërmjet dy emisioneve të Klan Kosovas që pothuajse janë të ngjashme në disa përmasa. Debate frytdhënëse, informata aktuale dhe të freskëta në një termin mjaft të qëlluar. Moderimi ka qenë në nivel të lartë, duke e ngritur edhe cilësinë e emisionin. Ngjashëm edhe temat e trajtuara kanë qenë tema interesante për shikuesit dhe gjithnjë kanë qenë aktuale. Ora e pasdites dhe Info-Magazine janë emisionet e vetme që ndajnë një pozitë.

18 Express (KTV)

Vazhdon të mbetet njëri nga emisionet shtylla të KTV-së. Ka arritur të zhvillohet me kalimin në kohës duke vazhduar të ruaj primatin për magazinën më informative dhe më të mirë në televizionet tona. Gjithçka që ju intereson nga bota e filmit, muzikës, shoubizit dhe kulturës në përgjithësi nga skena vendore ofrohen në një pjatë që është Express. Mendoj që është emisioni më i mirë i këtij zhanri në kanalet kosovare.

17 Ezel (RTV21)

Pa dyshim seriali më i mirë turk në kanalet tona deri më tani. Serial të zhanrit dramë në gjuhën turke nuk kam parë gjatë tërë jetës. Dinamika nëpër të cilën zhvillohet ngjarja, misteri, storia, drama që ofron ky serial e bën një kryevepër të produksioneve televizive turke. Ka qenë i vetmi serial të cilin e kam shikuar deri në një pikë kur nuk kam arritur të ec me ritmin në të cilin transmetohet. Thjesht 10 orë serial turk në javë është tepër për mua. Fundin dhe pjesën tjetër kam arritur të përcjell në vete, dhe nuk jam i zhgënjyer aspak. Si çdo fund turk edhe ky nuk ishte më i duhuri, por ndryshe nga ato latinet, këto nuk të gëzojnë në fund. Suksesi më i madh i RTV21 me serialet turke të cilat janë bërë simbiozë me këtë televizion kombëtar.

16 Pa Skenar (RTK)

Njëri ndër programet më të mira në RTK padyshim. Autorja, Antigona Qena sjell nostalgjinë televizive për të gjithë ata që kanë shikuar televizion edhe para këtij shekulli. Ka pasur disa emisione shumë të mira, interesante, e sidomos e kujtoj atë me dy komedienët e paraluftës, Ibrahim Krajkovas dhe Rasim Thaçit. Ky emision mendoj që ka qenë qershia mbi tortë për këtë sezon të Pa Skenar, në mesin e disa emisioneve të shkëlqyeshme. Shpresoj të rikthehet edhe sezonin e ardhshëm duke na freskuar edhe më shumë kujtimet tona.

15 Europa League (KTV)

Më në fund edhe Europa League erdhi në kanalet kombëtare kosovare. Me nga një ndeshje në javë zakonisht, KTV arriti të mbaj një balancim duke ofruar vetëm ndeshjen më interesante për shikuesit. Ishte fati i KTV-së që disa nga skuadrat më të forta u mënjanuan nga Liga e Kampionëve duke sjell derbi edhe më të mëdhenj në Europa League. Kjo garë doli të jetë një blerje e shkëlqyeshme e Kohavisionit.

14 Ora 7 (Klan Kosova)

Përkundër stafit që shpesh di të mbaj një qëndrim indiferent dhe mendjemadh ndaj shikuesit ky emision është njëri ndër më alternativët në televizionet tona. Mënyra inovative e realizimit, interkonektimi ndërmjet moderatorëve, interaktiviteti me shikuesit, mbulimi i temave të gjithanshme, dhe një “mirëmëngjesi” i veçantë për të gjithë poseduesit e kabllorëve ose satelitorëve ka qenë ajo që e bën këtë emision special dhe dukshëm më të suksesshëm se të tjerët. RTV21 ka një program mëngjesi solid, ngjashëm si RTK, derisa ajo që dëshpëron është KTV, që nis lajmet në një ambient që duket si i përgjumur dhe seriozisht pas Interaktivit të një nate më herët kush është i interesuar për lajme në mëngjes, thuajse ka ndodhur diçka ndërmjet atyre 6 orëve të natës. Ora 7 mbizotëron mbi emisionet tjera në mëngjes.

13 038 Live (KTV)

Definitivisht magazina më e mirë për kryeqytetin. Edhe për këtë emision kam pasur dyshime nëse do të funksiononte pesë herë në javë. Jam gabuar, pasi po funksionon për mrekulli së paku deri tani. Pos temave ditore ka trajtuar edhe tema për historinë e kryeqytetit duke ofruar informata të reja që jo domosdo kanë qenë të lidhura me aktualitetet. Megjithatë transmetimi shumë i ngushtë ndërmjet reprizës dhe origjinalit, që nuk është problem vetëm për këtë program, është i panevojshëm. Përndryshe një program shumë informativ.

12 Exclusive (Klan Kosova)

Njëri ndër emisionet më të mira në kanalet tona. Një dokumentar që nuk përqendrohet vetëm në luftën e fundit siç ndodh me dokumentarët e RTK-së, por që thellohet nëpër tema të ndryshme të cilat kanë relacion ndërmjet epokave të ndryshme. Dikush mund ta përziej emrin me atë emisionin që transmetohet në Top Channel, por duhet të pranoj që të dyja janë të shkëlqyeshme, të ndërtuara ashtu secila në mënyrën e vet. Padyshim emisionin më i mirë në Klan Kosova.

11 Cosmo (KTV)

Shumë lëvizje nëpër skemën programore të KTV-së për tu pozicionuar në fund të javës punuese, të premteve në ora 22:30. Përkundër orarit jo shumë të favorshëm, Cosmo ka arritur të sjell disa tema shumë interesante, e më së shumti duket të ketë zgjuar interesim intervistomi i Besarta Jasharit në fillim të marsit. Është një emision i mirë që meriton një orar më të mirë, ndoshta para lajmeve kryesore në ndonjë ditë të caktuar të javës.

10 Drejtësia në Kosovë (RTK)

Një spin-off program nga Jeta në Kosovë që ka arritur të gjej audiencë lojale brenda një viti të transmetimit. Ajo çfarë nuk pajtohem me këtë emision është koha e transmemit pasi thjesht të dielat mendoj që duhet të jenë për programe argëtuese. Vet formati i emisionit është i shkëlqyeshëm. Sjell intervista interesante me tema dytësore të Jeta në Kosovë e të cilat në fakt nganjëherë janë edhe më interesante se ato të JNK. Rubrika Policia mendoj që është pjesa më e preferuar e këtij emisioni jo vetëm për mua por edhe për numrin e konsiderueshëm të shikuesve. Mua më kujton në një mënyrë emisionin Cops. Për momentin emisionin është duke shkuar mirë dhe me plotë meritë vendoset në Top 10 emisionet kosovare për sezonin e kaluar televiziv.

9 Fehi’s Show (RTV21)

Emisioni më i mirë në RTV21. Në fakt i vetmi që kalon serialet turke. Fehmi Ferati ka arritur të sjell një format të ri të emisioneve në ekranet tona. Njërin ndër formatet më të preferuara për mua të programeve amerikane, ato të natës së hershme. Ka provuar të marr shembull nga Jay Leno, që në fakt nuk është ndër të preferuarit e mi, por, nuk ka shtuar edhe kreativitetin e tij në emision, me të cilin jemi mësuar në prodhimet e tij të mëhershme ku thjesht ka qenë i shkëlqyeshëm. Personalisht mendoj që ka shumë punë për të bërë në perfeksionizmin e Fehi’s Show nëse krahasohet me ato emisionet simotra amerikane. Por, për vitin e parë ka bërë mjaft duke u adaptuar në një rol jo të lehtë, e krahasuar me emisionet tjera kosovare, sigurisht që meriton të jetë në mesin e dhjetë më të mirave.

8 Liga e Kampionëve (RTK)

Sa kuptim ka RTK pa Ligën e Kampionëve? Imagjinojeni të martat edhe të mërkurat pa futboll, ashtu siç ndodh nga mesi i dhjetorit deri në mes të shkurtit. Kemi dhjeëtra emisione informative dhe një ton dokumentarësh për luftën e fundit. Herë pas here ka ndonjë film, dhe nganjëherë episod të ndonjë seriali që nuk ja vlen të filloni ta ndiqni pasi kushedi se kur do të transmetohet episodi vijues. RTK pa Ligën e Kampionëve nuk ekziston të martën dhe të mërkurën.

Kur ka futboll është ndryshe. Këtë vit ka pasur shumë ndeshje interesante në vjeshtë, përballje gjigantësh, e finalet e pranverës kanë ofruar ajkën e futbollit evropian. Nuk dyshoj që disa ndeshje kanë sjell shumë shikues para ekranit të RTK-së, por duhet të bëjnë diçka që të ngushtojnë formatin 16/9 në 4/3 pasi shpesh nuk duket topi në fushë. Këtë problem e ka edhe KTV. Gjithashtu edhe më shumë ndeshje të komentuara të Agron Berishas do të ishte e mirëseardhur, kuptohet nëse fitojnë të drejtat për tri vitet e ardhshme.

7 Lajmet e KTV-s (KTV)

Lajmet më të pavarura në televizionet tona padyshim. KTV ka arritur të ruaj një paanshmëri dhe rezistencë ndaj pushtetit duke ofruar gjithnjë lajmet më të pavarura dhe më të sakta tek shikuesit tanë. Mbulimi i protestave të shkurtit ka qenë ndër pikat më të forta të departamentit të informacionit të KTV-së këtë sezon. Gjithashtu transmetimi i lajmeve në ora 7 në mbrëmje vazhdon të jetë orari më i mirë për mendimin tim në televizion. Edhe Klan Kosova është munduar të mbuloj gjerësisht ngjarjet e sezonit të kaluar, përfshirë edhe protestat. Megjithatë transmetimi i lajmeve në ora 8 në mbrëmje, sidomos gjatë vjeshtës dhe dimrit kur bie terri në ora 4-5 na bën të ndihemi si spanjoll që han darkë në ora 22. Nëse janë të guximshëm le të vendosin të gjitha televizionet lajmet në të njëjtën kohë, dhe jo tu lejojnë ithtarëve të politikës (disa pleqve zakonisht) nga 3 orë lajme të vazhdueshme në mbrëmje.

6 Milioneri (RTK)

Më duhet të pranoj, Milioneri ka filluar të humb “zjarrin”. Fillimi i Agron Llakajt, njëri nga personalitet e preferuara të mija në televizion ishte i mahnitshëm. Ai akoma vazhdon të jetë ai që ka qenë gjithmonë, i hareshëm me batuta të kohëpaskohshme dhe tregime joshëse dhe interesante për shikuesin. Por, ajo çfarë më pengon mua dhe shumë të tjerëve është ndihma që u jepet disave sidomos në pesë pyetjet e para në lojë. Po të mos ishte frika që do të gaboja në pesë pyetjet e para, edhe unë do të konkurroja në Milioner. Dua të them që standardi i kuizit më duket se ka rënë me këtë pasi ka filluar të duket si një emision që të jep rastin e dytë dhe nëse je i shpejtë në përzgjedhje siguron 250 euro. E kur jemi tek 250 euro, shumat të cilat shpërndahen janë komike. Nëse vlerësojmë një mesatare prej 3500 eurove për çdo emision (dy veta të arrijnë në pyetjen e 10të pasi edhe nuk do të mjaftonte më shumë kohë), bën një total prej 14 mijë eurove në muaj që është më pak se sa që paguan RTK për një episod që transmeton. Grand Media është koha të shpërndani më shumë para, pasi për këto vite vetëm dy veta kanë arritur në pyetjen e 15të nëse s’gabohem.

5 Oxygen (RTK)

Emisioni i vitit të ri i Oxygen ishte më i miri i sezonit. Që nga atëherë emisioni ka ndryshuar goxha shumë, është larguar Jehona Ferati, është ndryshuar sponsori dhe moderimi i emisionit vetëm nga Besim Dina na është dukur risi. Mysafirët kanë qenë të përzier, por duhet të urojmë punën e Besim Dinës për ti dhënë hapësirë shtresave të ndryshme sociale duke rritur edhe vetëdijën e qytetarëve për ato shtresa. Ka pasur mysafirë shumë interesant dhe të njohur, të cilët thjesht na kanë kënaqur me tregimet e tyre. Emisioni zgjat paksa shumë, shpeshherë deri në ora 1 gjë që ka bëër në zvogëlimin e interesimit për shikuesit e hershëm. Megjithatë rikthimi të premteve në ora 10 është shumë më mirë dhe më i frytshëm se vendosja në ora 3 të dielave. Por, mund të vendoset edhe më herët, diku rreth orës 9 dhe të mbyllej siç duhet, para mesnate, pasi thjesht kujt i interesojnë debatet politike të premtave.

4 Jeta në Kosovë (RTK)

Dy sezonave të fundit Jeta Xharra po është shumë më pak e angazhuar në këtë emision. Pa marrë parasysh se sa të suksesshëm janë udhëheqësit e rinj të emisionit, debatet me Jeta Xharrën në rolin e moderatores janë më ndryshe, më të veçantë. Emisioni vazhdon të debatoj dhe të trajtoj tema të ndryshme aktuale që zgjojnë interesim tek shikuesit. Gjithashtu pjesa hulumtuese është në nivelin më të lartë që ka qenë ndonjëherë duke e vënë emisionin në njërën nga shtyllat kryesore kundër korrupsionit dhe padrejtësisë. Vizita nëpër qendrat spitalore nëpër Kosovë ka qenë ndër rubrikat që më ka pëlqyer më së shumti këtë sezon në këtë emision. Edhe këtë vit Jeta në Kosovë vazhdon të jetë njëri ndër emisionet më të mira në Kosovë dhe padyshim më i miri në kanalin publik, RTK.

3 Kafeneja Jonë (RTK)

Programi më i mirë i dy viteve të kaluara sivjet është renditur vetëm në pozitën e tretë. Kjo jo medoemos ka lidhje direkte me rënien në cilësi të serialit pasi edhe dy emisionet që renditen më lartë kanë pasur suksese të jashtëzakonshme gjatë kësaj periudhe. Megjithatë Kafeneja Jonë nuk është ajo Kafeneja Jonë e para dy viteve. Me keqardhje e them që seriali ka filluar të plaket. Kjo vjen si pasojë e kreativitetit të pamjaftueshëm dhe adaptimit ndaj ndryshimeve. Sezoni nisi me Lejlan duke premtuar risi, të cilat për disa javë u bënë bajat pasi i vetmi person që nuk u lidh me të ishin karakteret femra. Më pas ishte ai ndryshimi me karakterin e Bekimit. Ndryshimi i karakterit të tij nuk më kishte pëlqyer as herën e kaluar. Gjithnjë kam sugjeruar që të zhvendosin serialin në katund duke i dhënë më shumë hapësirë Fekës dhe një pjese të vogël të karaktereve. Kjo do të bënte shikuesit të ndjenin mungesë për shumicën e karaktereve të zakonshme dhe pas një aventure 10-15 episodesh të rikthejnë serialin në ambientin ku tashmë zhvillohet për disa vite. Mendoj që kjo do të funksiononte duke ia zgjatur jetën serialit para se të shuhet kah sezonet e fundit siç kishte ndodhur me Kafeneja Jonë.

2 Interaktiv (KTV)

Interaktiv është bërë edhe më interaktiv këtë vit. Me përfshirjen e komenteve nga Facebook dhe Twitter, ky emision ka arritur të krijoj një mini-revolucion në mediat tona. Ndoshta edhe është emisioni më i mirë në televizionet tona, por shumë herë na ka lënë pa gjumë dhe për këtë s’do ta vendos në pozitën e parë. Dhe për arsye se akoma ndjej nostalgji për komeditë e orës 11:30 në mbrëmje të KTV-së. Shakatë mënjanë ky emision është i mrekullueshëm. Është diçka si “Natën e mirë, fëmijë”, por, për të rritur. Nuk keni nevojë të dëgjoni asnjë lajm apo debat gjatë ditës, pasi të gjitha i gjeni të përmbledhura në Interaktiv para se të shkoni të fleni. Lajmet kryesore të ditës të shtjelluara dhe të diskutuara, pos ndërmjet moderatorëve edhe me mysafirin që ka lidhje direkte me temën kryesore të ditës. Sporti në KTV ka ruajtur formatin duke u zgjeruar edhe me diskutim ndërmjet moderatorëve. Rubrika për fotografitë e ditës, përmbledhja e shtypit, e deri tek komentet dhe pyetjet e shikuesve jo vetëm me e-mail e SMS por tani edhe me Facebook e Twitter, e bëjnë këtë emision prej më të mirëve në Kosovë. E mbi të gjitha udhëheqja nga moderatorët më të mirë kosovar të udhëhequr nga Xhemajl Rexha dhe Aurora Susuri e bën këtë emision thjesht të pakrahasueshëm me të tjerët.

1 Rubikon (KTV)

Të transmetosh tri herë në javë emision debatues mund të duket e tepërt. Në fakt edhe personalisht kam pas dyshime nëse do të ketë sukses ky format i ri. Duhet të pranoj që jam befasuar me suksesin që ka arritur ta tregoj Adriatik Kelmendi me Rubikon. Cikle të reja si Rishikimi i Historisë dhe Pa Kravatë kanë arritur të sjellin disa nga episodet më interesante në televizionet tona. Adelina Ismaili, Blendi Fevziu, dhe dy herë Hashim Thaçi kanë mjaftuar për të ofruar episodet më cilësore të Rubikon këtë sezon. Është mënyra se si Adriatik Kelmendi udhëheq emisionin duke mos ndërprerë fjalën e mysafirëve dhe në të njëjtën kohë duke mos i lejuar hapësirë të tepërt. Shpërndarja e kohës ndërmjet debatuesve dhe zgjedhja e temave, sidomos tek Pa kravatë, kanë qenë anë të suksesshme të këtij emisioni. Është e pamundur të gjesh ndonjë fjalë apo koment negativ për emisionin, pos nëse ndjehesh “i lënduar” dhe në hall si bashkëpartiakun yt. Nëse flasim për paanësi dhe korrektësi në debate politike atëherë mos kërkoni ndokund tjetër. Këtë e gjeni në programin më të mirë në kanalet kosovare për sezonin 2011-2012.

Luan Morina

Kritik për TV&Film