Tag: dokumentar

King Bibi (2018) – Dokumentar

16/08/2021 / Luan Morina

Pas shumë vitesh, Izraeli – shteti i fundit që ka njohur Kosovën – ka një kryeministër të ri që nuk quhet Benjamin Netanyahu.

Karizma e tij, afërsia e tij me Donald Trump, dhe ndërlidhja e Izraelit me Kosovën gjatë këtyre 12 muajve të fundit më kishte shtuar kureshtjen që mos të mendoja dy herë në ‘marrjen’ e këtij dokumentari, i cili pothuajse është i pamundur të gjendet në internet, dhe jo për ndonjë arsye anonime.

Dokumentari, i realizuar në vitin 2018, vjen nga një regjisor anonim i cili ka vetëm një dokumentar të gjatë të realizuar më parë, dhe atë në vitin 2013 rreth ditëve të fundit të ambasadës izraelite në Teheran.

‘King Bibi’ mban vetëm filmime nga arkiva, derisa sjellë një kolazh linear të jetës politike të Benjamin Netanyahut, që para fillimit të karrierës së tij si politikan, deri në shndërrimin e një mbreti që i vesh vetit rolin e një profeti të popullit hebre.

Pasi që nuk kam parë filma të tjerë me këtë temë, dhe nuk besoj që do të shohë, nuk mund ta krahasojë me një dokumentar pro-Netanyahu, ndonëse mbetem i bindur që dokumentari sjellë një pasqyrë neutrale mbi karakterin kryesor.

Dokumentari në vete përmban edhe shumë detaje të ngjarjeve, dhe rrugët e ndërtimit të tyre, siç ishte ngritja e Netanyahut brenda partisë, shfrytëzimi i tragjedisë personale për të marrë pushtetin, nxitja e masave me qasje radikale, e të cilat pos që bënë mbret Bibin, shpinë edhe tek vrasja e kundërshtarëve të tij, liderëve shtetëror izraelit.

Mund të them që është një histori e frikshme, sidomos për dikë që nuk ka qenë pak a shumë i njohur me situatën politike në Lindjen e Afërt në të ‘90tat e këndej – nga ku mbaj mend unë – por, personalisht, nuk ka qenë asgjë që nuk kam pritur nga figura e King Bibit.

Është një dokumentar që duhet të shikohet nga kushdo që merret me politikë, por edhe nga ne, qytetarët e thjeshtë. Nota personale: 5/5

APOCALYPSE Stalin (2015) – Recensim

26/10/2019 / Luan Morina

“Mos dërgo më njerëz për të më vrarë. Tashmë kemi zënë pesë veta, njëri me bombë dhe një tjetër me pushkë. Nëse nuk ndalon së dërguari vrasës, unë do të dërgoj një në Moskë, dhe s’do të kem nevojë të dërgoj të dytin.”

Këto janë fjalët e Josip Broz Tito-s, i cili ka shmangur fatin e njëzet milion viktimave të Stalinit. Dikush këtë shifër e çon deri në 60 milion njerëz të vrarë nga Stalini dhe regjimi i tij, përfshirë në mënyrë indirekte. Për dallim prej Stalinit, regjimi i Hitlerit ka vrarë 12 milion gjatë Luftës së Dytë Botërore.

Njeriu i hekurt, siç quhej Joseph Vissarionovich Stalin, ka sunduar Bashkimin Sovjetik nga viti 1922 deri në vitin 1953 si sekretar i përgjithshëm i Partisë Komuniste. Ardhja e tij në pushtet vjen pas vdekjes së Leninit, i cili siç do ta shihni nuk ka pasur mendim aq pozitiv për pasardhësin e tij. E pushteti që merret me forcë, nis nga eliminimi i më të afërmve, siç kemi mësuar nga diktatorë të ndryshëm, nisur nga i yni Enver Hoxha!

Si çdo seri APOCALYPSE, edhe kjo për Stalin që vjen në tri episode sjell pamje ekskluzive të zhgroposura nga arkiva të ndryshme televizive. Një gjë shtesë është ngjyrosja e tyre. Si rrjedhojë kemi një histori të diktatorit më të madh evropian të shekullit të kaluar, e cila shtrihet më shumë se që duhet para ardhjes së tij në pushtet, por gjithnjë me qëllimin që të sjellë sa më shumë detaje për jetën e tij.

Por, një anë negative është kërcimi nëpër kohëra e tema të ndryshme, gjë që krijon huti tek shikuesi. Personalisht do të preferoja një shtrirje lineare të historisë. Megjithatë, është një histori që duhet të shikohet patjetër, pasi ka shumë gjëra të pathëna më parë, e disa tjera të detajizuara sa s’ka më. Një dokumentar që s’guxon të humbet, të cilin mund ta gjeni shpesh në Tring History. Nota personale: 5/5

Aerial Britain – Sezoni 1

25/10/2019 / Luan Morina

Është një bukuri e veçantë për dokumentarët ‘ajror’. Pamja që ofrojnë nga syri i shpendit na jep një vështrim më të gjerë, më të plotë mbi një botë pakufi. Dhe pas serive të bollshme të këtij zhanri për SHBA-të, Francën, e Kanadanë, më në fund kemi edhe një mini-seri për Britaninë e Madhe.

Janë katër episode që përqendrohen në rajone të Anglisë – Jugore dhe Veriore, Uellsin, dhe Skocinë. Sigurisht që një episod një orësh është minimal për të sjellë një pamje të detajuar të më të mirave të këtyre regjioneve, por shpresa gjithmonë është që të ketë sezon të dytë.

Si zakonisht – vetëm me narracion, pa zbritur shumë në tokë – episodet sjellin pamje të vendeve më të rëndësishme historike, bukurive natyrore, mrekullive industriale, dhe qendrat kulturore që bëjnë Britaninë të njohur nëpër botë.

Ndër lokacionet që u kushtohet më shumë hapësirë janë Pallati Mbretëror Buckingham, kështjella e Mbretit Arthur, Liverpulli i Beatles, skena e Wuthering Heights të Emily Bronte, ishujt bregdetar të Uellsit, rrafshnaltat e Skocisë, dhe shumë tjera.

I shkurtër, i shpejtë, sikur kalimthi na dërgon nëpër këto dhe vende tjera ky sezon i ‘Aerial Britain’. Nevojiten më shumë episode, së paku edhe një sezon. Deri atëherë ky mbetet vetëm një gërvishtje mbi Britaninë e Madhe nga ajri. Nota personale: 4/5

Impossible Engineering – Sezoni 6 (Recensim)

16/08/2019 / Luan Morina

Si fans i antikës, shpesh herë provoj të gjej përfundime racionale, përtokë, rreth ndërtimit të piramidave të Egjiptit të Lashtë, të Majave, e edhe statujave të Ishullit të Pashkëve. Besoj që këto dhe ndërtime tjera, për neve që nuk jemi arkitektë e ndërtimtarë, janë mbresëlënëse e të mistershme në masë. Por, disi i lëmë në plan të dytë ndërtimet moderne.

Shumë ndërtime të sotme na bëjnë të bluajmë mendjen për mënyrën e realizimit të tyre. Një seri që merret me këto është ‘Impossible Engineering’ ose siç mund ta keni parë në kanalin Tring World sidomos – Inxhinieria e të pamundurës. Sigurisht që sezonet paraprake, goxha interesante transmetohen aty, por nuk mbesin mbrapa sezonit të gjashtë.

Sezoni i gjashtë ka vetëm gjashtë episode dhe përqendrohet kryesisht në hekurudhat. Në fakt janë që të gjitha episodet lidhen me trenat dhe hekurudhat, me hekurudhën që pritet të bashkoj malet ndër më të pakalueshmet në botë – Andet. Është njëra ndër historitë më mahnitëse kjo e këtij treni dhe kësaj hekurudhe e cila del të jetë një frymëmarrje për banorët e kësaj pjese të botës. Në lartësi është edhe episodi për ndërtimin e urës 400m të lartë që do të lidhte Himalajat e largëta. Treni i të ardhmes, hyperloop, me shpejtësi deri në 1000km në orë; projekti 11 miliard dollarësh i trenit gjigant të qytetit të Nju Jorkut, dhe hekurudha e moçaleve të Nju Orlins janë në tri episodet tjera. Gjersa episodi i dytë i sezonit sjell një vështrim mbi historinë e hekurudhave amerikane.

Fakti që sezoni përqendrohet në hekurudha dhe trena mund të jetë pak i kotë për shumicën, por edhe i përkryer për fansat e trenave. Për neve që jemi në mes të dyjave, është një argëtim i mirë prej gjashtë orëve, gjithmonë duke sjell njohuri në lidhje me inxhinierinë, në këtë rast hekurudhore. Nota personale: 3/5