shkrime për filma, seriale, sport, e filozofi jete

Tag: his dark materials

His Dark Materials – Sezoni 2 (me spoilera)

Sezoni i parë i His Dark Materials ka qenë fantastik.

Historia ka qenë e thjeshtë, e ndarë në dy paralele, pjesa teknike ka qenë e mrekullueshme, gjithçka ka pasur kuptim.

Sezoni i dytë nuk e vazhdon këtë.

E pritshme ka qenë të zgjerohet tema, të shpërndahen historitë, por edhe pak e lodhshme në këtë masë.

Në këtë sezon kishim historinë e nënës së Lyra, së babait të saj, babait të Will, të Lyras e Will, të Lee, të Boreal, të Magjisteriumit; dhe krejt këto shumë rrallë e ndoshta asnjëherë nuk ndesheshin. Paskam harruar edhe atë të shkencëtares, e cila shkel në botën e Will e Lyra.

Nëse përqendrohemi më ngushtë, në skena e ngjarje, kemi pasur gjëra të bukura për sy – kryesisht udhëtimet e Lee dhe të shtrigave. Kemi pasur momente emocionale që përfshinin Lyran dhe Will, sikur momentet kur humb ‘busullën’ Lyra, kur Will merr thikën, dhe sigurisht – kur zonja Coulter vret Borealin, e vdekja e Lee në fund.

Nuk ka qenë sezon i keq, assesi. Por, ka qenë një sezon shumë i shkapërderdhur që të çon mallin sikur po anashkalohet pa i dedikuar mjaft kohë temave të rëndësishme.

Aktrimi ka qenë fenomenal, edhe këtë sezon.

Dafne Keen e Amir Wilson kanë pasur një harmoni të mirë skenike, Ruth Wilson ka shkuar edhe një hap më afër çmendurisë, Will Keen në rolin e kardinalit ka kryer detyrën e tij të antagonistit, e më së shumti më ka pëlqyer zhvillimi i karakterit të Borealit.

Por, sigurisht që gjithçka mbetet në plan të dytë me Andrew Scott e Lin-Manuel Miranda. Që të dy kanë pasur atë peshën pozitive të barabartë me Lyra e Will, veçse në një anë të kundër të temës.

Edhe pjesa teknike ka qenë në nivel, por megjithatë, mbetem pak i zhgënjyer me skenarin. Ndoshta serisë i janë dashur edhe më shumë sezone, një zhvillim më i rregullt i historisë. Më intereson të shoh se çfarë do të ndodhë në relacionet prind-fëmijë në sezonin e ardhshëm, duke marrë parasysh se ku u mbyll ky sezon. Nota personale: 3/5

His Dark Materials – Sez.1 (2019)

Kur ke punë me Hans Zimmer e Ramin Djawadin, sigurisht që mëson diçka. Edhe Lorne Balfe duket se ka mësuar të bëjë një hyrje të magjishme muzikor në serinë ‘His Dark Materials’.

Dhe ‘intro’-ja vjen pas një përmbledhje të shkurtër, pasur me shtrimin e figurave kryesore për episodin në radhë. E tetë episode të sezonit të parë të ‘His Dark Materials’, shtrihen për mrekulli deri tek pika finale në fund të episodit të tetë. Po, do të ketë sezon të dytë, sepse kështu bëjnë punët BBC – qysh në fillim e dinë sa hapësirë ke, dhe i grah punës!

Dikush e ka parë ‘The Golden Compass para disa viteve, dhe pak a shumë e di si ecin gjërat tek kjo seri, e cila njëjtë sikur filmi në fjalë është e adaptuar nga trilogjia e Philip Pullman. E tema ka të bëjë me një botë fantastike, e ndarë nga bota jonë me anë të portave, nëpër të cilat kalon daja i Llajras, Asrajell (James McAvoy). Filmi nis me këtë të fundit që lë Llajran (Dafne Keen – ajo vajza tek ‘Logan’), nën kujdesin e Drejtorit të shkollës.

Llajra, dhe të gjithë banorët e kësaj bote kanë nga një ‘dimën’ jo ‘demon’, që është kafshë e cila flet me pronarin e saj dhe çdo ndarje në largësi të caktuar i humb mendjen dhe jetën njëri-tjetrit. Miku më i mirë i Llajras është një djalë, një tjetër 12 vjeçar, i cili kidnapohet nga Zonja Kullter (Ruth Wilson). Kjo kidnapon fëmijët dhe i ndanë nga dimënat e tyre, për t’i dërguar në një ambient eksperimentues. Një viktimë e tillë do të jetë edhe vet Uilli.

Sigurisht që tema në seri është më shkurtimisht e shtjelluar se sa në libra, por pikat kryesore nuk humbin. Në fund të sezonit të parë do të marrim shumë përgjigje, disa të cilat na lindin gjatë episodeve të fundit. Por, shumëçka mbetet për sezonin e dytë. E ky sezon vetëm sa ‘ndizet’ me finalen.

Aktrimi i Llajras është i shkëlqyeshëm, ngjashëm si i Ruth Wilson, derisa as tjerët nuk mbesin mbrapa. Ka edhe shumë detaje interesante që nuk janë përmendur, ngjashëm edhe aktrime. Është një seri që të mban të lidhur dhe ‘zgjuar’ përgjatë secilës episod. Edhe teknikisht është e realizuar tepër mirë.

Mund të prisni sezonin e dytë, mund t’ia nisni tashti. Nuk është diçka që mund të kënaqë secilin, ama nuk zhgënjen në atë që ofron. Nota personale: 5/5

© 2023 Bllog Personal

Theme by Anders NorénUp ↑