Pse formati i ri është më i mirë se aktual?
Gati 25 vite pas ndryshimit të formatit 8×4, UEFA do të ndryshojë Ligën e Kampionëve në masë po aq të madhe nga sezoni 2024-25.
Ndonëse keni pasur mundësinë të lexoni shumë kundërshtime, formati final është shumë më i mirë se ai aktual, për disa arsye.
E ata që e kanë kundërshtuar kryesisht mund të jenë fansa të ekipeve italiane dhe spanjolle – nja tri të cilat kanë përkrahur Superligën që është krimi më i madh që do i bëhej futbollit!
Një grup me 36 ekipe
Sistemi zviceran që po e quajnë do të ketë një grup/ligë që do të ketë 36 ekipe – katër më shumë se tashti.
Derisa në fazën grupore një ekip është ndeshur me 3 ekipe, tash do të ndeshet me 8 ekipe. Pra, nuk kanë nevojë Barcelona të luajë 2 ndeshje me BATE Borisovin dhe ta rrisë golaverazhin pa nevojë. Njëjtë, edhe BATE nuk ka nevojë të luajë dy ndeshje me Barcelonën kur mund të luajë një me Barcelonën e një me Manchester Cityn, që do të jetë më interesante për fansat e tyre.
Pra, në vjeshtë do t’i kemi dy mesjavë më shumë me futboll evropian që do të jetë më mirë se sa tri pushime kombëtaresh.
Kombëtaret
Derisa mendoj që po të kishim një afat kombëtaresh për vjeshtë dhe një për pranverë, me verën rezervuar për to, me shumë gjasë do të largohet vetëm njëri nga afatet e vjeshtës derisa dy do të mbesin. Cilido që largohet është i mirëseardhur.
Një ekip po nis sezonin në mes të gushtit, 2 loja hajde në pushim. Po kthehen prej pushimit 4 loja në kampionat 2 në Evropë hajde në pushim. Prapë njëjtë. Është sendi më i kotë në futboll për momentin.
Kalendari i ri i FIFA-s me konfederatat që përcakton këto afate do të duhej të përfundonte para Kongresit të vjeshtës, dhe atëherë do të dimë më mirë se çfarë do të ndodhë pas 2024 më saktë.
+4 ekipe
Dy ekipet që do të duhej të shkonin direkt për shkak të suksesit në Evropë por do të mbetnin në pozitën më të afërt me Champions ka qenë ide palidhje. Kjo është larguar pas presioneve dhe është vendosur diçka e re.
Një pozitë shkon për më të mirë ligën në Evropë në pesë vitet e fundit – Anglia; dhe për pozitën e pestë.
Pozita tjetër shkon për ekipin e renditur në pozitën e pestë në po të njëjtën renditje – pesë vjeçare, e cila përcakton shpërndarjen e vendeve nëpër të tri kupat evropiane.
Dy ekipet e fundit janë nga dy vendet e para në renditjen e sezonit paraprak në garat evropiane. Pra, këtu përfitojnë vetëm ato dy vende që kanë pasur ekipet më të suksesshme në garat evropiane sezonin e fundit.
Dallimi
Këtu na duhet të bëjmë një qartësim të hollësishëm.
Shpërndarja e vendeve në garat evropiane dihet një vit para se të fillojnë garat.
Për shembull, cili vend sa ekipe do të ketë në garat evropiane në sezonin e 2023-24 është përcaktuar dje, pas finales së Championsit. Kosova nga kampionati i ardhshëm do të ketë 3 ekipe në Evropë – kampioni në Ligën e Kampionëve; nënkampioni dhe i treti në Ligën e Konferencës. Ekipi i katërt në Evropë do të jetë fituesi i kupës në Ligën e Konferencës.
Pra, Kosova i ka katër ekipe në Evropë nga kampionati i ardhshëm. Kjo nuk ndryshon. Nuk mundet të ndryshojë në asnjë mënyrë! Pos nëse na përjashtojnë për çfarëdo arsye!
Nga kjo renditje 5 vjeçare (2017-2022) do varen dy pozitat shtesë në Ligën e Kampionëve.
E kjo renditje sot është:
- Anglia 106.641
- Spanja 96.141
- Italia 76.902
- Gjermania 75.213
- Franca 60.081
- Portugalia 53.382
Sipas kësaj, i pesti nga kampionati i ardhshëm (2022-23) i Anglisë do të kualifikohej në Ligën e Kampionëve 2023-24. E njëjta vlen për pozitën e katërt të Francës!
Por, do të jetë edhe një bonus për kombet nga renditja një vjeçare. Dy vendet me më së shumti pikë do të kenë nga një vend shtesë në Ligën e Kampionëve.
Renditja 1 vjeçare (2021-22) është:
- Anglia 21.000
- Holanda 19.200
- Spanja 18.428
- Franca 18.416
- Gjermania 16.214
Sipas kësaj renditjeje, i pesti nga kampionati i porsa kryer i Anglisë (2021-22) do të kualifikohej në Ligën e Kampionëve 2022-23. E njëjta do të vlente edhe për të tretin e ligës holandeze.
Më shkurt
Nga katër vendet shtesë, dy vende përcaktohen qysh në fillim të sezonit, domethënë e dimë ekipi i pestë i cilit kampionat do të shkojë në Ligën e Kampionëve. Dhe, nëse ekipet e atij vendi do të jenë të suksesshme gjatë sezonit mund të dërgojnë edhe ekipin e gjashtë në Ligën e Kampionëve?!
6 ekipe në Ligën e Kampionëve?!
Kjo pjesë nuk kam parë të jetë qartësuar diku deri sot, po edhe nuk kam vërejtur ndonjë kufi se sa ekipe mund të jenë në Evropë nga një vend. E di që më parë kanë qenë 7 ekipe nga një vend, por këtë vit Gjermania do të ketë 8 ekipe në Evropë.
E nëse na del ndonjë Eintracht tjetër që nuk arrin të renditet në 9 pozitat e para por fiton Ligën e Kampionëve, a do të kemi 10, apo nëse fitojnë të tria garat evropiane dhe renditen në pozitat 10 e më poshtë të kemi 12 ekipe në Evropë nga një vend?!
Nuk e di, ani pse doket më e pamundur se Kosova të dërgoj pesë ekipe në garat evropiane.
Ndeshjet grupore
Nga tetë ndeshje sa do t’i kenë në grupe, BATE Borisov për shembull s’do t’i luajë të tetat me ekipet më të mira të Evropës. Nëse nuk ka ndryshuar ideja fillestare kur ishin 10 ndeshje, ekipet do të ndahen përsëri në vazo.
Tash me 8 ndeshje, në katër vazo, BATE do të duhej të luante 2 ndeshje me 9 ekipet më të mira të Evropës, pastaj dy me ato të vazos së dytë e kështu me radhë. Njëjtë edhe Barcelona do të luante dy ndeshje me 8 ekipet tjera më të mira në Evropë dhe dy ndeshje me dy nga ekipet 27-36 në Evropë.
Edhe Europa League do të ketë formatin e njëjtë të grupeve, me po aq ndeshje – tetë ndeshje, derisa Conference League do të ketë 6 ndeshje, ani pse do të kenë nga 36 ekipe, të dyja!
Finalet
Tetë të parat në ligë do të kualifikohen për 1/8 e finales. Ekipet e renditura nga pozita 9 deri në 24 do të luajnë playoff.
Mund të bazohemi në Europa League dhe playoffin e sivjetmë për ta kuptuar më mirë.
Fituesit e grupeve në EL u kualifikuan për 1/8 e finales. Të dytët e grupeve në EL luajtën me të tretët e grupeve në CHL, dhe kështu me radhë.
Për momentin mbeten ndeshjen vajtje-ardhje në fazën e eliminimeve, por ka pasur zëra që mund të heqë dorë UEFA nga dy ndeshje dhe të luajë vetëm një ndeshje eliminimi, varësisht shortit apo renditjes. Kjo do të varet edhe nga Kalendari i FIFA-s.
Rendi i ri shoqëror
Propozimi duhet të miratohet nga ligat e edhe një herë nga UEFA, por vetëm kanë filluar tenderët e transmetuesve kështu që ndryshimet duhet të jenë minimale. Akoma duhet vendimi përfundimtar si dhe kalendari i FIFA-s për të vulosur këtë ndryshim.
Sidoqoftë, tash e kemi të qartë se qysh, çka, nga 2024 e tutje.