Tag: Mad Men

Doni po rikthehet. Por, do të përqendrohem një herë tek Megan. Njoftimi i saj me Stefaninë sikur riktheu realitetin për Donin e vjetër, edhe pse ajo xhelozia e Megan ishte pa nevojë. ‘Dhurata’ që i bëri Donit, duke e kthyer në atë të vjetrin sa i përket lidhjeve të tija, nuk mjaftoi. Është një Megan dëshpëruese, e cila medoemos po përpiqet ta bëj Donin më shumë për vete. I gjithë ky insistim shfaqet rishtazi dhe befasishëm, papritur. Gjithashtu shpërthimi i saj karshi Donit tregon që ajo nuk është një bashkëshorte aq e humbur që nuk e njeh të burrin dhe nuk di gjë për të.

E Doni dalëngadalë po provon të kthehet ndoshta aty ku e ka vendin. E kam përmendur javën e kaluar tek ndërlidhja me tregimin për Mets. Akoma besoj që Don nuk do të fundoset më shumë dhe ka vetëm një kahje tash e tutje, e kjo u vërejt më së miri në këtë episod.

Por, kjo mënyrë jetese e tij duket e paqëndrueshme për lidhjen e tyre. Ndoshta Herri ka të drejtë, Doni e ka vendin në Los Anxheles. Së paku aty nuk ka aq shumë që e urrejnë sa në Nju Jork.

Një pjesë e madhe u përqendrua tek Majkëll. Derisa do të më mungoj karakteri i tij simpatik në serial, nuk mendoj se gjithçka që fliste çmenduri. Ndikimi i kompjuterit tek shefat është i çmendur, por sidoqoftë duhet të ketë diçka tek ata. Edhe pse ndoshta mund të ishin vetëm duke biseduar për Phillip Morris. Qysh do që të jetë Llu më duket se e kemi aty vetëm për të na shkatërruar nervat. Nuk e di a janë të gjithë edhe nga shikuesit kundër Donit, apo nuk jam i vetmi që tani përkrah atë më shumë se më kurrë. Ndoshta është vetëm një metodë e Weiner për të na kthyer kah karakteri i tij më shumë.

Nuk besoj që Betty dhe Don ndonjëherë do të kthehen bashkë. Nuk besoj që do ti shohim as në një skenë së bashku më. Por, po duket sigurisht që edhe Beti e ka një fund. Ndoshta vetëvrasje! Nuk besoj që të dyja do të jenë gjallë e mirë në fund të serialit, edhe Megan edhe Beti. Por, tani për tani kemi Betin arrogante, formën që ka marrë qysh nga ndarja me Donin. Nuk di sa do të duroj Henry, dhe nuk di si do të mbijetoj në pjesën e mbetur, por, edhe karakteri i saj do të ketë një tregim për në fund të serialit.

E fundi i kësaj pjese po afrohet. Besoj që do të gjej Donin të ketë qëruar hesapet me kompaninë. Shpresoj të marrim edhe disa përgjigje para pjesës finale të vitit të ardhshëm.

Episod i mirë, i kënaqshëm.