Tag: silicon valley

Silicon Valley – Recensim serie (2014)

26/04/2020 / Luan Morina

Zor që nuk keni dëgjuar deri sot për Luginën e Silikonit në lajmet e teknologjisë!

Ka mundësi që nuk keni dëgjuar edhe për ‘Silicon Valley’ më pas, por disi më duket pak e përmendur. Ose ndoshta fajet i ka gjenerata ime e ‘bumerëve’ që nuk shikojmë kësi seriale aq shumë :p

Thuhet se historia është inspiruar nga jeta e Mike Judge gjatë viteve të ‘80ta i cili është bashkë-krijues i serisë dhe producent televiziv e filmik.

Riçardi, për ata që nuk e kanë parë, është pjesë e një grupi që provon të ‘ndez’ në Luginën e Silikonit. Dhe grupi është i kompletuar me të gjithë personat e karakteret që duhet ta bëjnë një seri komike të shkëlqyeshme si kjo. Riçardi është ai që i mban bashkë, dhe CEO i kompanisë që krijojnë – Pied Piper. Gillfojll është një personalitet që të kënaq shpirtin me ftohtësinë dhe negativitetin e tij në krejt këtë grup. Dineshi është një axhami që bie pre e rrengjeve të Gillfojll. Erllik është ai që mban në shtëpinë e tij këta, dhe të tjerë si Xhian-Jang. Monika është ajo që përkrahë këta, por kurrsesi nuk ia del t’i drejtojë. Dhe pastaj kemi Xharedin, i cili e ka dominuar sezonin e fundit me shpërthimin e tij, ani pse nuk ka mbetur mbrapa në sezonet e mëparshme.

Gjashtë sezone dhe 53 episode nuk është ‘normale’ të përfshihen në 300-400 fjalë. Por, ‘karakteret’ po i dini, dhe ngjarjen pak a shumë, kështu që 27 orë të jetës suaj të mbushura me të qeshura i keni të garantuara nëse nuk hiqni dorë para kohe. E koha është sezoni i dytë. Ju nevojitet pak kohë të familjarizoheni me karakteret, dhe me ngjarjen, e pastaj s’ka gjë që ju ndalë. Dhe s’do të mbeteni pishman. Aspak.

Është një ndër seritë më inovative, më e popullarizuar tek njerëzit që merren me teknologji informative, programues e dizajnues të ndryshëm. Por, nuk është një seri e përcaktuar vetëm për këta. Mund ta ndërlidhim me ‘The IT Crowd’ e ‘The Big Bang Theory’, por është më ndryshe! Megjithatë nuk mbetet mbrapa. Nota personale: 5/5

SPOILERAT

Vazhdimësia e serisë ka qenë e shkëlqyeshme. Sezoni i fundit është qershi mbi tortë. Por, do të dëshiroja që grupi t’ia dilnin vërtetë, si milionerë. Ndoshta nuk është keq si përfunduan, por megjithatë, mendoj se kanë merituar më shumë.

Edhe jo, nuk më pëlqeu qasja në episodin e fundit, si një intervistë me ta. Ndoshta ka qenë një episod më gjatë se që duhet. Ose së paku pjesa e fundit e episodit. Tekefundit numri shtatë është baksuz! Megjithatë, një episod nuk mund të prish një seri senzacionale. Shtimi i një sozie të Gillfojllit në sezonin e fundit ka qenë ndër më të mirat që kanë bërë së fundmi.

Mendoj që është tepruar me Gavinin, si dhe Rusin. Por mbetet njëra ndër komeditë më të mira me temë teknologjinë, ndonëse nuk ka aq shumë të tilla.

Silicon Valley – Sezoni 4 (me spoliera)

16/07/2017 / Luan Morina

Tash e tutje ‘Silicon Valley’ s’do të jetë i njëjtë pa Erllih Bakmanin. Largimi i TJ Miller pos që Continue reading

Silicon Valley – Sezoni 3 Recensim

28/07/2016 / Luan Morina

Shumëçka, apo më mirë të them gjithçka ka ndodhur në këtë sezon të Silicon Valley.

Si Pied Piper sikur Hooli kanë lëvizur lart e poshtë në trajektoren e biznesit. Kjo lëvizje ka qenë goxha e këndshme për mua si shikues.

Duke nisur me rrugëtimin e Richardit nga ku e kishim lënë, deri tek udhëtimi i secilit karakter; lidhjet e tyre mes vete, dhe instancat e shumta komike, mund të them që sezoni i tretë i Silicon Valley ka qenë edhe më i mirë se të kaluarit duke u rritur në cilësi për tu formësuar në një komedi të mirë.

Nominimet për Emmy, sidomos i Thomas Middleditch nuk janë aspak nga ajo që meritojnë i tëri kasti dhe ekipi i këtij seriali.

Rrugëtim interesant ishte i Richardit i cili nga fillimi deri në fund ka bërë një rotacion të plotë ku mbetet të vendoste për gjëra madhore në fund. Erlich si gjithnjë ka qenë në krye të detyrës me gjithë ato bizneset e ‘veçanta’ që bën. Ka një harmoni skenike të mirë me Nelsonin dhe më pëlqen të shoh këto dy karaktere në skena të njëjta. Megjithatë ky çift mbetet mbrapa Gilfoyle dhe Dineshit. Ky i fundit për disa arsye ka qenë komik këtë sezon, përfshirë dashuriçkën e tij të shkurtër. Por, Gilfoyle është ‘loçkë’ karakter për shkak të injorancës dhe sarkazmit që përdor karshi karaktereve tjera. Ai vazhdon me këtë fund e krye gjatë sezoni dhe është ndoshta ndër arsyet kryesore për ta shikuar këtë serial. Ndërkohë Jared ka pasur atë botën e tij ‘anësore’ në krahasim me karakteret tjera.

Gavini ka qenë i përqendruar më shumë tek bota shtazore këtë sezon. Edhe ai ka bërë një rrotullim prej 360 shkallësh. Edhe pse ka një frymë negative ndoshta në serial, personalisht arrij të gjej një humor që rezulton me të qeshura të kohëpaskohshme tek ky karakter. Derisa Laurie ka vazhduar me të vjetrën, Monica ka qenë ndoshta karakteri që është zhvilluar më së shumti këtë sezon – shpresoj për qejfin e shikuesve. Ajo arrin të krijoj një ‘shpinë’ në fund kur edhe del në plan të parë pasi qëndron si në hije për pjesën më të madhe të sezonit.

Më pëlqeu angazhimi i Stephen Tobolowskyt në rolin e Jack Barker. Ky rol nuk ndryshon me shumicën e atyre që kam parë më herët të portretizohen nga ai, mendoj tek mënyra e aktrimit, por ishte freski e bukur. Besoj që do të vazhdoj të mbetet pjesë e serialit pas atij hapi të mençur të skenaristëve për ta mbajtur në serial. Por, edhe mund të largohet pa shumë kohë.

Si përfundim ky sezon i Silicon Valley, ashtu siç e përmenda më lart, mbetet më i miri deri tani dhe më inkurajon fakti që po ecën me këtë ritëm të përmirësimit me çdo episod të kaluar. Ka shumë potencial për të vazhduar me këtë ritëm edhe për më shumë se një sezon. Mbetet një ndër komeditë më të mira aktualisht në televizion.