Steven Spielberg – Bllog Personal

A keni pa film të mirë për luftën?

Pa marrë parasysh se kush humb në fund, nuk do të definoja ndonjë film për luftën si të kënaqshëm për tu parë. E më i rëndi, akoma, për mua mbetet “All Quiet on the Western Front” që duhet të jetë obligim për tu parë nga secili njeri së paku një herë në jetën e tij.

Vetëm që t’i rikujtohet që lufta më shumë se liri, nxjerr përfitues që shfrytëzojnë viktimat e pafajshme për të ngopur shpirtrat e tyre të uritur!

Krejt çfarë jep lufta, nga fillimi në fund, edhe shumë vite më vonë bile, Steven Spielberg sjellë në filmin “Saving Private Ryan”.

Nga zbarkimi në Normandi, nëpër frontin e parë, nëpër fushat e minuara, gërmadha, varreza të pavarrosura, përballje me armikun e armatosur deri në dhëmbë, përballje me armikun e zhveshur deri në brekë, e përfundimi i misionit, në njërën mënyrë a tjetrën, na vjen në këtë film që mund t’i kujtoj dikujt ndonjërin nga versionet e shtrenjta të Call of Duty.

Veçse me një dallim të vogël – këtu nuk ringjallen as karakteret dytësore, as ato kryesore.

Tom Hanks luan rolin e kapitenit Miller i cili niset në mision për të larguar nga fronti ushtarin Ryan. Kjo pasi tërë vëllezërit e tij kanë humbur jetën, e sipas rregullave, në raste të tilla, djali i fundit i familjes duhet të largohet nga fronti për të mos u shuar një familje e tërë.

Në këtë mision, Kapiteni Miller shoqërohet nga trupa e tij, e portretizuar për merak nga aktorë të cilët paraqitjen e karrierës e kanë në këtë film – Tom Sizemore, Edward Burns, Barry Pepetter, Adam Goldberg, dhe Vin Diesel me flokë!

Ka edhe emra tjer si Ted Danson e Dennis Farina, por që mbeten në plan të dytë derisa ne si shikues jemi në mision me trupën e Hanks.

E shtjellimi i historisë, sidomos në aspektin vizual është i veçantë falë mjeshtrit të regjisë. Efektet vizuale janë goxha reale, e edhe më reale shfaqen emocionet, si në beteja si në paqe, sado e përkohshme që është ajo. Kjo e bën këtë njërin nga filmat më të mirë të luftës, falë një bashkëpunimi të përshtatshëm të ekipit pas kamerës, dhe kastës së aktorëve, të cilët japin më të mirën nga vetja në këtë film.

E di që ka shumë filma për luftën, asnjë që të kënaqë, por janë të paktë ata që thellohen me një intensitet të këtillë në karaktere të caktuara, e edhe më pak në regji të Steven Spielberg. Nota personale: 5/5

E gjeni edhe në Netflix – https://www.netflix.com/watch/21878564

E PrimeVideo – https://www.primevideo.com/detail/0HOL83IEVH27ZH50BTYO1BZ8PY

Lufta është e llahtarshme! Më i keq se lufta është gjenocidi – një ushtri kundër një populli të pambrojtur!

Shumica të parën e kemi mësuar nga televizori, të dytën nga jeta reale, kush më rëndë e kush më lehtë!

Janë disa momente – kur ke në dorë fuqi të pakufishme – që përcaktojnë karakterin e një njeriu! Por, edhe në momente të tilla, një njeri nuk e ka të lehtë t’i kundërvihet çohet kundër popullit, kundër ushtrisë, sado që gabim të jetë shumica në rrugën e padrejtë.

Oskar Schindler e bëri!

E ky film i Steven Spielberg, më shumë se një vepër kinematografike është një dedikim për të guximshmit që edhe në kohët kur drejtësia e njerëzimi vdes, gjejnë kurajë t’i dalin ballë e të ruajnë atë pak hije drite që për shumëkënd është shpresa e vetme për një të nesërme.

Ndonëse pjesa artistike mbetet në plan të dytë, që nga ideja e aplikimit të ngjyrës vetëm në momente specifike gjatë filmit për të shfaqur zymtësinë e temës dhe ngjarjes, nga shtrirja e historisë që nuk përqendrohet kryekëput në karakterin kryesor, deri tek kolona zanore e të mahnitshmit John Williams, ‘Schindler’s List’ mbetet një film i jashtëzakonshëm për luftën, që nuk i mbetet borxh përshkrimit të njërës nga periudhat më të kobshme në histori të njerëzimit.

Steven Zaillian kryen një punë të shkëlqyeshme në skenar që mishërohet me regjinë e Spielbergut për një produkt final që gjen finesën në aktrimin e dy protagonistëve në anë të kundërta të historisë. Liam Neeson mrekullueshëm gjallëron rolin e Oskar Schindler, si një njeri me fytyrë të butë, zemër të madhe, e mendje të zgjuar. Në anën tjetër kemi Ralph Fiennes që ndonëse mund të ngjajë deri diku me figurën e Neeson, sjell një karakter krejt tjetër, së paku sipërfaqësisht, ndonëse dikush mund të kontestojë anën tjetër të karakterit të tij. Ndërkohë, kemi një Ben Kingsley në rolin e Itzhak Stern, tek i cili mund të shohim një pasqyrë të qytetarëve çifut në atë periudhë të kobshme për ta. Ndonëse mbetet një kryevepër arti, tema e filmit, e bën atë njërin nga filmat më të rëndësishëm në histori. Dhe kjo s’do të mund të bëhej pa Spielbergun.

‘Schindler’s List’ është film për një njeri të vetëm, por mendoj që i dedikohet shumë Oscar Schindler-ave tjerë, si gjatë Luftës së Dytë Botërore, si para e pas saj, në konflikte e lufta të ndryshme, ku individë të caktuar i janë kundërvër pushteteve mizore duke u bërë mburojë e të pambrojturve. Nota personale: 5/5

E gjeni edhe në Netflix – https://www.netflix.com/watch/60036359

Tag: Steven Spielberg

Saving Private Ryan (1998)

Schindler’s List (1993)