Më në fund një film ku Andrew Garfield nuk lufton kundër një hardhuce!
Por, aktrimi i tij në tick, tick…BOOM! është larg më i mirë, dhe po të mos ishte Hacksaw Ridge, do thosha që ky është roli i karrierës së Andrew Garfield.
Tek ky film, që e gjeni në Netflix, Andrew Garfield luan rolin e një aktori dhe muzikanti, Jonathan Larson, derisa ai përgatit veprën e tij debutuese në teatër, Superbia.
Ngjarja zhvillohet në Nju Jorkun e fillimit të viteve 1990ta, atëherë kur si çdo 30 vjeçar normal, Xhonathan provon të martohet e të krijojë familje për shkak të presionit që ka nga tezet e gjyshes, dhe tezet e tezeve të gjyshes, e kështu me radhë…
Jo, jo, nuk është muhabet masdarke, tjetër temë ka filmi.
Xhonathani provon të mbarojë veprën e tij të parë që ka një temë të ngjashme me veprën e Oruellit, “1984”. Dhe derisa bën këtë, ai duhet të manovrojë me punë që ta prishin kreativitetin, të mbijetojë, të manovrojë jetën personale, e atë shoqërore.
Dhe Andrew Garfield shkëlqen në rolin e Xhonathanit duke u mishëruar me këtë karakter në të gjitha këto sfida. Aktrimi i tij, përfshirë vallëzimin e këndimin është madhështor!
Thjesht është filmi i Andrew Garfield, dhe tjerët janë aty vetëm për ta bërë atë edhe më të mirë.
E në rolet tjera vijnë Alexandra Shipp si e dashura e tij, Robin de Jesus si mik i tij, dhe Vanessa Hudgens.
Skenari është i shkëlqyeshëm ndonëse mungesa e rimës në pjesët e Superbia-s, pra këndimi e vallëzimi dikujt mund mos t’i pëlqejë nëse preferon muzikalët e tillë, por fotografia, aktrimi, zhvillimi i ngjarjes është i shkëlqyeshëm.
Ndoshta është ndër filmat më të mirë të vitit, në regji të Lin-Manuel Miranda i cili kryen një punë të zellshme që nderon jetën dhe veprën e një kolegu të profesionit të tij.
Është film që tregon që të shkruash nuk është lehtë. Aq më pak kur truri nuk është një makinë që e mbush me të dhënat, shtyp butoni, dhe del produkti final! Të shkruash është torturë!
Mbi të gjitha, është film i Andrew Garfield. Nota personale: 5/5