shkrime për filma, seriale, sport, e filozofi jete

Tag: will ferrell

Anchorman: The Legend of Ron Burgundy (2004)

Para se ‘influencerët’ të cilët s’mund të influencojnë as më të afërmit e tyre të blejnë produkte që reklamojnë, pos nëse u jepen falas; para se gazetarët të kthehen në paparazzi e p…. që për interesa të ngushta ‘lakojnë të vërtetën’, gazetaria ishte profesion fisnik e i respektuar nga të gjithë!

Sidomos nga publiku i San Diegos të viteve 1970ta, kur ekipi i lajmeve të mbrëmjes së Kanal 4, dominonte shikueshmërinë. Së paku deri kur në ekip bashkohet femra e parë në këtë profesion, Tits Mekgi!

Kur karakteri i Christina Applegate prishë botën mashkullore të katërshes gjigante udhëhequr nga legjendari Ron Burgundi, çapkëni Brajan Fantana, banalisti sportiv Çemp Kind, dhe meteorologu Brik Tamllend, lufta për ‘mbijetesën e mashkullores’ në televizion merr hov!

Nën regjinë e Adam McKay, i cili bën skenarin bashkë me mikun e tij që edhe i jep jetë vet legjendës Ron Burgundi – Will Ferrell, filmi sjellë një satirë të kënaqshme të botës televizive të asaj kohe, me plot çaste komike që thumbon karakteret kryesore mendjemëdha, bota e të cilave shkundet nga ardhja e spikeres së parë.

Është komedi tipike e McKay e Ferrell, e parregullt, e pacipë, e çmendur, bash për qejfin tim!

Prandaj, si një fans i legjendës, dëgjues i rregullt i podcastit të Ron Burgundy, me të cilin në këtë drejtim tani jemi kolegë, nuk mund të jem objektiv për këtë film. As për vazhdimin. As për podcastin. Aq më pak për Ferrell e McKay.

Bashkë me Will Ferrell, në rolet kryesore vijnë edhe David Koechner, i paplakuri Paul Rudd, dhe legjenda tjetër e komedisë, Steve Carrell. Këta i japin kuptim legjendës, secili me botën e tyre të çoroditur, e më së shumti nga ta, meteorologu Steve Carrell. Ka edhe paraqitje momentale të karaktereve dytësore, sidomos gjatë ‘luftës’ së ekipeve të lajmeve, e cila ‘eskalon shumë shpejt’. Do të thosha që është njëra ndër komeditë e mija të preferuara. Për shumëkënd, nuk është as komedi, por, shumë gajle e madhe! Nota personale: 5/5

Eurovision: The Story of Fire Saga (2020) – Recensim

Will Ferrell. Rachel McAdams. Islanda.

Tri fjalë të mjaftueshme për të shikuar këtë film, i cili do të ju ofrojë rreth dy orë argëtim të shkëlqyeshëm në këto kohë pandemie.

Will Ferrell, njëri ndër aktorët komik më të dashur për mua, vjen në rolin e Lars, i cili me bashkëfshataren e tij Sigrit – Rachel McAdams janë yjet muzikore të Husavikut. Ëndrra e Lars është e thjeshtë – të fitojë Eurovisionin.

Krejt pahiri, ata marrin ftesën për garën kualifikuese kombëtare për Eurovision, dhe nga aty nis aventura e bendit Fire Saga dhe e jona.

Harmonia skenike e Ferrell dhe McAdams është e këndshme. Që të dy përqafojnë karakteret e veta të çuditshme, duke gjetur përshtatje të rrjedhshme me njëri-tjetrin në skenë. Në mesin e dy të çuditshmeve, sigurisht që Sigrit është më e mençur se gjithçka që mund të aktrojë Ferrell.

Në bashkëpunim me EBU-në, filmi na sjellë disa nga yjet më të njohura të Eurovisionit të viteve të fundit, pa harruar edhe disa nga hitet më të popullarizuara në histori të kësaj gare, nisur nga ABBA legjendare. Është një ode e kënaqshme për këtë ngjarje, të cilën personalisht e kam harruar viteve të fundit, marrë parasysh devijimin nga një ngjarje artistike në një protestë politike.

Ky film, përmbledh më të mirat e Eurovision, në një tregim pak më serioz se shumica me Will Ferrell, mbushur me ngjarje komike e qesharake, të cilat prekin kufirin e normalitetit.

Pierce Brosnan vjen në rolin e babait shpërfillës të Larsit, dhe njëkohësisht Kazanovës së Husavikut duke bërë që në çdo pyetje për Lars e Sigrit ‘a jeni vëlla e motër?’ njëri përgjigjet me ‘jo’ tjetri me ‘ndoshta’. Dan Stevens, Legjioni i famshëm nga super-seria e FX, vjen në rolin e një superylli rus, shoqëruar nga yje tjera të Eurovisionit si Alexander Rybak e Loren, si dhe Demi Lovato.

Një super-komedi e cila ofron krejt ato çfarë mund të pritet nga ky film. Fotografi të bukur, linja qesharake – këndoje ja ja ding dong, aktrim e skenar të mirë. Nota personale: 5/5

© 2023 Bllog Personal

Theme by Anders NorénUp ↑