Tag: you

You – Sezoni 4 (me spoilera)

23/03/2023 / Luan Morina

Ndonëse mund të ngulmojnë që ishte më ndryshe se zakonisht, sezoni i katërt i You, është më i dobëti deri më tani. Ose ndoshta po e teproj me subjektivizëm.

Tash, pasi e ka bërë bërllok nëpër krejt Amerikën, Xho Golldberg zhvendoset në Mbretërinë e Bashkuar në ndjekje të Marianës. Këtu, tash është profesor i gjuhës, dhe kur jemi te gjuha, aksenti britanik teprohet e mbi-ekspozohet sa të shkon nerva.

Janë ajo klasa borgjeze britanike me aksentin e tyre, pjesë e së cilës bëhet vet Xho, tash Xhonathan, që të plasin nervat që nga fillimi.

Mirëpo, më duhet të pranoj që pjesa e dytë e sezonit, kur kuptojnë “sëmundjen” e Xhonathanit (të fundit, sepse dimë që ka qenë i sëmurë më parë), e bën pak më interesante sezonin, por fundi lë shumë për të dëshiruar.

Nuk ka shumë për të folur për aktrimin – gjithë çfarë ju duhet është të ndreqin buzët dhe të flasin anglishten borgjeze shumica e aktorëve dytësorë. Penn Badgley e ka mësuar rolin për mrekulli sa zor është ta shohim fytyrën e tij dhe të mendojmë në Den Hamfrin.

Fansat që ju ka pëlqyer fundi i sezonit të tretë nuk besoj që janë ndarë të pakënaqur. Ngjarja zhvillohet si zakonisht, veçse kësaj radhe ka më shumë vrasje e që ndoshta sjellë në pah ‘frikën’ e producentëve se mos bëhen ‘bajat’ të kalonin krejt sezonin me një a dy vrasje, duke bërë kurban nga një karakter për çdo episod.

Fundi lë shumë për të dëshiruar.

Dhe dëshira ime është të kemi dikë nga e kaluara që ndjekë Xhonathanin, ani pse mundësia që ajo të jetë Llov a Bek janë minimale. Një karakter i ri s’do prishte punë.

Por, nëse vazhdojnë tash Xhonathan e Kejt, atëherë çka? Do të vrasin klasën borgjeze si pjesë e revolucionit të proletariatit?! Tash po ankohem në mungesën e cilësisë së këtij sezoni, por nëse vazhdon, me këtë opsionin e dytë, atëherë do të bëhet edhe më bërllok! Nota personale: 3/5

You – Sezoni 3 (me spoilera)

14/02/2022 / Luan Morina

Hajde flasim për dashurinë!

Nuk është sekret që shumica përzgjedhim të duam atë që mendojmë që meritojmë ta duam, jo dikë që vërtet duam. Prandaj dikush vendos të durojë dhunën, qoftë psikike, fizike, a emocionale. Ashtu mbetemi të ngujuar nga frika që nëse hapim zemrën, nuk do na duan e pranojnë, prandaj durojmë!

Kërkojmë atë që do na bën të jemi “ekipi më i mirë” qysh thotë Love gjatë këtij sezoni të tretë të You, e që ishte edhe më i mirë se i dyti!

Tashti, ta kemi të qartë, unë isha dhe jam #TeamLove, ani pse fundi qe i kobshëm për mua si fans i këtij ekipi, por i përkryer si fans i serisë.

Aq mirë qe shkruar, shtjelluar, zhvilluar ngjarja sa që arritëm tek përmbyllja fenomenale e sezonit të tretë.

Por, le të shohim pak në detajet që e bënë këtë sezon më të mirë se tjerët.

Gjithmonë dy janë më mirë se një, dhe kur gjen dikë më të çmendur se ti, atëherë ke qëlluar preminë e jetës. Kjo ishte Love për Joe. Ose së paku ashtu premtohej me fundin e sezonit të dytë. Ndonëse, nuk besoj që ka pasur shumë që kanë pritur këtë transformim të Love.

Vet fundi i sezonit të dytë ku Joe lëshon sytë në Margaret, na bën të ditur që do i kthehet rrugëve të vjetra. Porse, u gabuam.

Margaret qe shtesë e mirë në seri, pika kryesore për të zhvilluar këtë sezon, por Conradët, të cilët na shoqëruan në episodet e fundit… Pafjalë!

Disi na kthyen më normale krejt këto që bënin Joe e Love, për dashurinë, për dallim prej Conradëve. Sidomos Cary! Fundi i tyre, ngjashëm si i Theos, qe diçka pozitive për mua, sepse nuk na nevojiteshin më shumë viktima. Pastaj tek karakteret dytësore interesante ishte edhe zhvillimi i karakterit të nënës së Love, sidomos në lidhjet e tyre nënë-bijë, dhe vendimin e saj për tu rrëfyer në Joe.

Por, si për çdokënd të interesuar dhe aktiv për shëndetin mendor, seancat e terapisë së Joe e Love mbesin ndër pjesët më të mira të këtij sezoni. Si dhe finalja.

Harmonia skenike (ose që po ja bojnë disa kimia) e Veronica Pedrettit e Penn Badgley ka qenë fenomenale. Sidomos episodi final dhe seancat. Disi nuk mund të mendojnë dikë që do të ishte përshtatur më mirë, as BrAngelinën te Mr. & Mrs. Smith, me të cilin film pak ngjan finalja, por është shumë më e mirë se filmi. Karakteret e Marienne e Theo ishin të rëndësishëm, por mbetën në plan të dytë më shumë se që mbesin këto karaktere për mua zakonisht. Nuk di sa do të kenë hapësirë në sezonin e katërt, por…

Nuk e dua sezonin e katërt! Jo pa një prequel për të kaluarën e Love, për të cilën gjë janë dhënë mjaft detaje në këtë sezon! E ky sezon është ndër romancat më të mira të viteve të fundit në televizion. Nota personale: 5/5

YOU – Sezoni 1 Recensim

16/12/2018 / Luan Morina

Queen B e Dan janë kthyer në televizion, për dallim prej Serenës e cila pos që po merret me filma, e ka gjet edhe një burrë i cili e pret në fotografitë e përbashkëta! Për dallim prej Queen B (#TeamBlair4ever) e cila ka zgjedh komedinë – ‘Single Parents,’ Dan ka një rol që s’besoj që do i përshtatej ndonjë aktori më mirë se sa atij!

Tek ‘YOU’, Penn Badgley vjen në rolin e Joe i cili ka një histori misterioze pas tij. Ai është menaxher i një librarie, dhe me të takuar Beckin, ai bën atë që bën shoqja juaj më e ngushtë – hallakatë gjithçka që duhet të dini për dikë që ju intereson juve! Veçse, Joe e bën këtë për vete.

Guinevere Beck (Elizabeth Lail – princesha Ana tek ‘Once Upon a Time’), është një shkrimtare aspiruese, me një jetë pak të çrregullt. Ka një të dashur jo shumë të sjellshëm, dhe një shoqe që e do atë ndoshta më shumë se që duhet shoqja! Ose së paku kështu mendon Joe në episodin e parë. Joe ka një koleg pune, E thanin, dhe një fëmijë komshi i cili i kujton veten – Ethan. Nëna e Ethan është në lidhje me një polic dhunues, jo i ati i Ethan.

Këto dy fronte e sjellin një karakter të dyfishtë të Joe, i cili ia del të bëj më shumë se shoqja juaj më e ngushtë (shpresojmë!). Skenari është i shkëlqyeshëm, me një histori që lëvizën goxha shpejt për dhjetë episodet e sezonit të parë. Sjell të papritura për neve si shikues, dhe kjo e bën më interesant, më të shikueshëm, dhe sigurisht aspak të kotë.

Sezoni i dytë vjen në Netflix direkt, pasi Lifetime pasi ka porositur sezonin e dytë, ia ka dorëzuar Netflixit. Po, është shfaqur në Lifetime, domethënë si audiencë targetuese ka gjininë femërore, kështu që nuk do të ishte e habitshme po të mos u pëlqente gjinisë tjetër. Nota personale: 4/5 (kanë mundur të gjejnë dikë më të mirë për rolin e Beckit)